QURAN E KAREEM ME ALLAH TA'ALA IRSHAD
FARMATA HAI
TARJUMA:
Aur falah paate jo zakaat ada karte
hain.
(PARA 18)
TARJUMA:
Aur jo kuch tum kharch karoge ALLAH
TA'ALA iski jaga aur dega aur wo behtar rozi dene wala hai.
(PARA 22, AYAT 39)
Ek aur jaga farmaan e khuda wandi hai
TARJUMA:
Jo log ALLAH TA'LA ki raah me kharch
karte hain unki kahawat is daane ki hai jisse 7 baley nikley har baal se sau
daane aur ALLAH TA'ALA jisey chahta hai zyada deta hai aur ALLAH TA'ALA wasa'at
wala aur badey ilm wala hai, jo log ALLAH TA'ALA ki raah me apne maal kharch
karte hain phir kharch karne k baad na ehsaan jatate hain na aziyat dete hain
un k liye inka sawaab inke rab k huzoor hai aur na inper kuch khaof hai aur na
wo ghamgeen honge, achi baat aur maghfirat is sadqe se behtar hai jiskey baad
aziyat dena ho aur ALLAH TA'ALA be parwah hai Halam wala hai.
(PARA 3, SURAH AL BAQARA, AYAT 260 -
263)
ZAKAAT NA DENE PER WAYEEDEY
Zakaar azam farz e deen o ehem arkaan se
hai, lehaza quran azam me 32 jaga namaz k sath iska zikr farmaya, aur tarah
tarah se bando ko is ehem farz ki taraf bulaya.
TARJUMA:
Mitata hai ALLAH TA'ALA sood ko aur
badhata hai khaeraat ko.
(SURAH AL BAQARA, AYAT 276)
Baaz darakhto me kuch ajzaye fasida is
qism k paeda hojate hain k ped ki uthaan ko rok dete hain, ehmaq nadaan isey na
tarashega k mere ped se itna kam hojayega, per aaqil hoshmand to jaanta hai k
inkey chaatne se ye no nihaal lehlaha kar darakht bandega warna yu hi murjhakar
reh jayega, yahi hisaab ZAKAAT k maal ka hai.
AHADEES E MUBARAKA
HADEES 01:
HUZOOR SARWAR E KONAIN ﷺ farmate hain, zakaat ka maal jis maal mme mila hoga isey tabah
kardega.
(AL BIZAAR, AL BEHAQI, RAWI UMMUL
MOMINEEN AYESHA SIDDIQUA رضي الله عنهما)
HADEES 01:
HUZOOR E AKRAM ﷺ farmate hain khushki o tari me jo maal talaf hota hai wo zakaat
na dene hi se talaf hota hai.
(AL TABRANI, RAWI HAZRAT OMER رضي الله عنه)
HADEES 03:
HUZOOR E AQDAS ﷺ farmate hain, jisne apne maal ki zakaat ada kardi beshak ALLAH
TA'ALA ne is maal ka shar isse dur farma diya.
(IBNE KHUZAYEMA FI SAHIH WA TABRANI FIL
AOSAT WA HAKIM, RAWI HAZRAT JABER BIN ABDULLAH رضي الله
عنهما)
HADEES 04:
HUZOOR E AKRAM ﷺ farmate hain, apne maalo ko mazboot qilo me karlo zakaat dekar
aur apne bimaro ka ilaaj karo khaeraat se.
(ABU DAWOOD, TABRANI, BEHAQI)
HADEES 05:
RASOOL ALLAH ﷺ farmate hain jo ALLAH TA'ALA aur iskey rasool per imaan laata
ho isey laazim hai k apne maak ki zakaat ada karey.
(TABRANI, RAWI HAZRAT OMER رضي الله عنه)
HADEES 06:
SYEDNA ABU ZAR رضي الله
عنه ne farmaya k
HUZOOR NABI KAREEM ﷺ ko maine farmate suna k
peeth tod kar karwat se niklega aur gaddi tod kar peshani se, inkey pastaan per
wo jahannum ka garam pather rakhenge k seena tod kar shaana se nikal jayega aur
shaana ki haddi per rakhenge k haddiyaan todta seene se niklega.
(MUSLIM, IKHRAJA AL SHAIKHAAN AN ALAHNAF
BIN QAES)
Aye azeez kya khuda aur rasool k farmaan
ko yunhi hasi thatha samajta hai ya 50 hazaar baras ki muddat me ye jaankaahey
musibatey jhelni asaan jaanta hai, zara yahi ki aag me ek aadh rupiya garam
karkey badan per rakh, dekh phir kaha ye garmi kaha wo qeher aag, kaha ye ek hi
rupiya kaha wo saari umar ka joda hua maal, kaha ye minute bhar ki der kaha wo
hazaaro baras ki aafat, kaha ye halka sa chaksa kaha wo haddiyaan todkar paar hone
wala ghazab, ALLAH TA'ALA musalmano ko hidayat bakhshey.
AAMEEN
HADEES 07:
HAZRAT ABULLAH BIN MAS'OOD رضي الله عنه ne farmaya, koi rupiya
dusrey rupiye per na rakha jaye na koi ashrafi dusri ashrafi se chu jayegi
balkey zakaat ne dene waley ka jism itna badha diya jayega k laakho karodo
jodey ho to har rupiya juda daagh dega.
(AL TABRANI)
HADEES 08:
HUZOOR SARWAR E DO ALAM ne farmaya, ek
azdaha mu kholkar iskey piche daodega, ye bhaagega isse farmaya jayega le apna
wo khazana k chupakar rakha tha k main isse ghani hoon jab dekhega k is azdahe
se kahi bachao nahi nachaar apna haath iskey mu me de dega wo aesa chabayega
jaese nar oont chabata hai.
(MUSLIM)
HADEES 09:
SARKAAR E DO ALAM farmate hain, faqeer
har gaz nange bhookey hone ki takleef na uthayenge magar aghniya k hatho, sunlo
aese to nagro se ALLAH TA'ALA sakht hisaab lega aur inhey dardnaak azaab dega.
(TABRANI)
HADEES 10:
SARWAR E KONAIN farmate hain, qayamat k
din to nagro k liye mohtajo k hath se kharabi hai, mohtaaj arz karenge k aye
rab hamare unhone hamare huqooq jo tuney hamarey liye in per farz kiya the
zulman na diye, ALLAH AZWAJAL farmayega k mujhe qasam hai apne izzat o jalaal
ki k tumhey apna qarb ata karunga aur inhey dur rakhunga.
(TABRANI)
HADEES 11:
HUZOOR E AQDAS ne kuch log dekhe jinkey
aagey pichey langotiyo ki tarah kuch chethdey the aur jahannam k garam pather
aur thohad aur sakht kadvi jalti badbo wali ghaans chaopaiyo ki tarah charte
phirte the, JIBRAEEL E AMEEN عليه السلام se
pucha ye kaon log hain? arz kiya k ye zakaat na dene waley hain aur ALLAH
TA'ALA in per zulm nahi kiya, ALLAH TA'ALA bando per zulm nahi farmata.
(AL BIZAAR)
MASAYEL FIQIYAH
ZAKAAT shariyat me ALLAH TA'ALA k liye
maal k ek hisse ka jo shara'a ne muqarrar kiya hai musalman faqeer ko malik
qaraar dena hai aur wo faqeer na hashmi ho na hashmi ka azaad karda ghulaam.
Zakaat farz hai, iska munkir kafir aur
na dene wala fasiq aur qatal ka mustahiq aur ada me takheer karne wala
gunahgaar mardood al shahada hai.
SHARA'ET
ZAKAAAT wajib hone k liye chand shartey
hain...
MUSALMAN HONA
Kafir per zakaat wajib nahi agar koi
kafir musalman hua to isey ye hukum na diya jayega k kufr k zamane ki zakaat
ada karey.
BAALIGH HONA
Na baligh per zakaat wajib nahi.
AAQIL HONA
Majnoon per zakaat wajib nahi jan k
junoon purey saal ko gherley aur agar saal k awwal o akhir me acha ho jata hai
chahe beech saal me acha na ho to zakaat wajib hai aur junoon agar asli ho
yaani junoon hi ki haalat me buloogh hua to iska saal hosh aane se shuru hoga,
yunhi agar junoon aarzi hai magar purey saal ko gher liya to jab afaqa hoga is
waqt se saal ki ibteda hogi.
AZAAD HONA
Ghulam per zakaat wajib nahi.
MALIK E NISAAB HONA
Nisaab se kam me zakaat wajib nahi yaani
jitne maal per shariyat ne zakaat muqarrar ki hai isse kam maal ka malik hai to
zakaat wajib nahi.
PUREY TAOR PER MALIK HONA
Purey taor per malik ho yaani isper
qabza bhi ho tab ZAKAAT wajib hai warna nahi.
MASLA:
Jo maal gum hogaya ya dariya me girgaya
ya kisi ne ghazab karliya aur iske paas ghazab k gawah nahi ya jungle me dafan
kardiya tha aur ye yaad nahi raha k kaha dafan kiya tha ya anjaan k paas amanat
rakhi thi aur ye yaad na raha k wo kaon hai ya madyoon ne deen se inkaar kardiya
aur iskey paas gawah nahi, phir ye maal mil gaya to wajib tak na mila tha is
zamane ki zakaat wajib nahi.
Agar aese per deen hai jo deen ka iqraar
karta hai magar ada me der karta hai ya nadaar hai ya qazi k paas iskey muflis
hone ka hukum ho chuka hai ya wo munkir hai magar iskey paas gawah maojood hain
to jab maal milega guzrey huye saalo ki bhi zakaat wajib hai, shayi marhoon ki
zakaat na murtahin per hia aur na raahan per aur rehen chudaaney k baad bhi in
barso ki zakaat wajib nahi.
NISAAB KA DEEN SE FARIGH HONA
Nisaab ka malik to hai magar isper itna
deen hai k deen ada karey k baad nisaab nahi rehta to zakaat wajib nahi chahe
deen bande ka ho (jaese zar saman kisi cheez ka taawan) chahe khuda ka (jaese
zakaat khiraaj).
Maslan koi shaks sirf ek nisaab ka malik
hai aur do saal guzar gaye k zakaat nahi di to sirf pehle saal ki zakaat to
isper deen hai iskey nikalne k baad nisaab baqi nahi rehta lehaza dusrey saal
ki zakaat wajib na huyi.
MASLA:
Jo deen maiyaari ho wo zakaat se nahi
rokta chonkey adatan deen meher ka mutaleba hota lehaza agarche shohar k zimme
kitna hi deen e meher ho jab wo malik e nisaab hai to zakaat wajib hai.
NISAAB KA HAAJAT ASLIYA SE FARIGH HONA
Jo maal hajat e asliya k alawa ho isme
zakaat wajib hai jab k wo nisaab k barabar ho.
HAAJAT ASLIYA
Yaani zindagi basar karne me jis cheez
ki zarurat ho isme zakaat wajib nahi, jaese rehna ka makaan, jaadey garmiyo me
pehenne k kapde, khanadaari k samaan, sawari k jaanwar, alaat, peshawaro k
aozaar, khaane k liye ghalla, ahle ilm k liye haajat ki kitabey.
MAAL KA NAAMI HONA
Maal ka naami hoa yaani badhne wala
khwaah haqeeqatan badhey ya hikman yaani agar badhana chahe to badhaye yaani
iskey paas ya iskey nayab k qabze me ho, har ek ki 2 surtey hain wo isliye
paeda hi kiya gaya ho isey khalqi kehte hain jaese sona chaandi k ye isliye
paeda huye hain k inse cheezey kharidi jaaye ya isliye makhlooq to nahi magar
issey ye bhi haasil hota hai k isey faali kehte hain.
Sone chandi k alawa sab cheezey faali
hain ya tijarat se sab me namu hoga.
SAAL GUZARNA
Saal se muraad qamri saal hai yaani
chand k mahino se 12 mahine shuru saal aur aakhir saal me nisaab kaamil hai
magar darmiyaan me nisaab ki kami hogayi to ye kami kuch asar nahi rakhti yaani
zakaat wajib hai.
ZAKAAT 3QISM K MAAL PER HAI
SAMAN YAANI SONA CHAANDI
MAAL E TIJARAT
SAYEMA YAANI CHARAYI PER CHODEY JAANWAR
Sone chaandi me mutalqan zakaat wajib
hai jab k baqadr isaab ho agarche dafan karkey rakey ho ya istemaal me ho
tijarat karey ya na karey aur inkey alawa baqi chizo per zakaat is waqt wajib
hai k tijarat ki niyyat ho ya charayi per chodey jaanwar.
MASLA:
Moti aur jawaheraat per zakaat wajib
nahi agarche hazaro k ho, haan agar tijarat ki niyyat se liye to zakaat wajib
hogi.
MASLA:
Jo shaks nisaab ka malik hai agar
darmiyaan saal me kuch aur maal badha to is badhey maal ka saal alag nahi
balkey pehle maal ka khatam saal is k liye bhi khatam saal hai, agarche saal
pura hone se ek hi minute pehle hasil hua.
MASLA:
Zakaat dete waqt ya zakaat k liye maal
alag karte waqt zakaat ki niyyat ka hona zaruri hai, niyyat k ye mayine hain k
agar pucha jaye to bila tatil bata sakey k zakaat hai.
MASLA:
Saal bhar tak khaeraat karta raha iskey
baad niyyat ki k jo kuch diya hai wo zakaat hai, is tarah zakaat ada na huyi.
MASLA:
Zakaat ka maal hath per rakaha tha k
faqeero ne loot liya to zakaat ada hogayi aur agar hath se girgaya aur faqeero
ne uthaliya agar ye isey pehchanta hai aur raazi hogaya aur maal barbaad na hua
to ada hogayi.
MASLA:
Zakaat ka rupiya murda ki tajheez o
takfeen (kafan dafan) ya masjid ki tameer me nahi laga sakta k is me faqeer ko
malik kardeta nahi paya gaya agar in chizo me kharch karna chahe to iska tariqa
ye hai k faqeer ko malik kardey ye faqeer kharch karey sawaab dono ko hoga.
Hadees e shareef me aaya hai agar sau
hatho me sadqa guzra to asab ko waesa hi sawaab milega jaesa dene waley ko aur
iskey ajar me kuch kami na hogi.
MASLA:
Zakaat dene me iski zarurat nahi k
faqeero ko zakaat kehkar de balkey sirf zakaat ki niyyat kaafi hai yaha tak k
agar koi aur lafz jaese hadya nazar ya bacho k liye mithayi khaane ko, tumhey
eid karne ko, kehkar kardiya aur khud niyyat zakaat ki rakhi to bhi ada
hojayegi .
Baaz mohtaj zaruratmand zakaat ka rupiya nahi lete inhey zakaat dene me zakaat ka lafz na kahey.
MASLA:
Ek hazaar ka malik hai aur do hazaar ki
zakaat di aur niyyat ye hai k saal tamaam tak agar ek hazaar aur hogaye to ye
iski hai warna aayinda saal me mehsoob hogi to ye jayaz hai.
MASLA:
Agar shak hai k zakaat di ya nahi to ab
de.
MASLA:
Zakaat dene k liye wakeel banaya aur
wakeel ko ba niyyat zakaat maal diya magar wakeel ne faqeer ko dete waqt niyyat
nahi ki ada hogayi yunhi zakaat ka maal zimmi ko diya k wo faqeer ko de de aur
zimmi ko dete waqt niyyat karli thi to ye niyyat kaafi hai.
MASLA:
Wakeel ko ikhtiyaar hai k maal e zakaat
apne ladke ya bibi ko de de jab k ye faqeer ho aur ladka agar nabaligh hai to
isey dene k liye khud is wakeel ka faqeer hona bhi zaruri hai, magar apni bibi
ya aolaad ko is waqt de sakta hai jab muwakkil ne inkey siwa kisi khaas shaks
ko dene k liye na keh diya ho, warna inhey nahi de sakta.
MASLA:
Wakeel ko ye ikhtiyaar nahi k khud lele,
haan agar zakaat dene waley ne ye keh diya ho k jis jaga chaho sarf karo to le
sakta hai.
MASLA:
Zakaat k wakeel ko ye ikhtiyaar hai k
baghaer ijazat malik dusrey ko wakeel banade.
MASLA:
Mubaah kardene se zakaat ada na hogi,
maslan faqeer ko zakaat ki niyyat se khana khila diya to zakaat ada na hogi,
isliye k ye malik kardena na hua, haan agar khana de de k khaley ya le jaye to
ada hogayi, yunhi zakaat ki niyyat se kapda de diya to ada hogayi.
MASLA:
Malik karne me ye bhi zaruri hai k aese
ko zakaat de jo qabza karna jaanta ho yaani aesa na ho jo phenk de ya dhoka
khaye warna ada na hogi jaese chotey bache ya pagal ko zakaat dene se ada na
hogi, jiskey bache ko itni aqal na ho to iski taraf se iska baap jo faqeer ho
wo qabza karley ya is bache ka wasi ya wo k ye bacha jiski nigrani me hai wo
qabza karley.
SONE CHANDI AUR MAAL TIJARAT KI ZAKAAT
Sone ka nisaab 20 mashqaal hai yaani 7.5
tole aur chaandi ka 200 dirham yaani 52.5 toley.
MASLA:
Sone chandi k alawa tijarat ki koi cheez
ho jiski qeemat sone chandi ki nisaab pahoche to isper bhi zakaat wajib hai
yaani qeemat ka chaliswa hissa aur agar asbaab ki qeemat to nisaab ko nahi
pahonchti magar iskey paas inkey alawa sona chaandi bhi hai to inki qeemat sone
chaandi k sath milakar majmua yaani jama karey agar majmua nisaab ko pahoncha
zakaat wajib hai.
Asbaab tijarat ki qeemat sone ki nisaab
ki qeemat se lagaye to nisaab nahi banti aur chaandi ki nisaab ki qeemat se
banaye to ban jati hai to isse lagayi jaaye jisse nisaab puri ho, jaese aaj kal
k 7.5 toley sone ki qeemat me chaandi ki kayi nisabey hogi, lehaza maal e
tijarat ko chandi ki nisaab ki qeemat se lagaye.
MASLA:
Sona bhi hai aur chandi bhi aur dono me
se koi bhi nisaab k barabar nahi to sone ki qeemat ki chaandi chaandi me milaye
to nisaab hojati hai aur chaandi ki qeemat ka sona soney me milaye to nisaab
nahi hoti wo wajib hai k jisme nisaab puri ho wo karey.
(QANOON E SHARIYATH)
MASLA:
Zakaat har nisaab o khums nisaab per
40wa hissa hai aur mazhab sahebeen per nihayad asaan aur fuqra k liye nafa ye
hai k fi sadi dhayi rupiye sone aur chaandi k nisaab se agar kuch zyada ho to
iska faeda ye hai k nisaab ka paanchwa hisse se kam zyadati ho to is ziyadati
me zakaat nahi hai.
Aur jab paanchwa hissa zyada hoga to
isme zakaat hogi maslan jiskey paas 7.5 toley sona hai to isper 2 maashey 3
ratti sona zakaat me dena farz hai, iskey baad 7.5 toley ka paanchwa hissa
(1.5) tola zyada ho yaani 9 toley sona hojaye to zakaat badhegi aur 9 toley se
kam yaani (8.5) toley me bhi wahi zakaat hogi jo 7.5 toley me thi.
Is tarah 9 toley ki zakaat (10.5) toley
se kam tak rahegi, jab (10.5) toley hojayega to zakaat badhegi, isi tarah
chaandi k nisaab me (52.5) toley ki zakaat 63 toley se kam tak rahegi jab 63
toley chaandi hojayegi to zakaat badhegi.
(FATAWA RAZWIYA)
MASLA:
Maal e tijarat me saal guzarne per jo
qeemat hogi iska aetebaar hai magar shart ye hai k shuru saal me iski qeemat do
sau dirham se kam na ho.
SAYEMA KI ZAKAAT KA BAYAAN
3 Qism k jaanwaro me zakaat wajib hai
jab k sayema ho, oont, bakri, gaaye, sayema wo jaanwar hai jo saal k zyada tar
hisse char kar guzar karta ho aur isse maqsood e sirf doodh aur bache lena hai.
Agar ghaans laakar khaate ho ya maqsood
bojh laadna ya hal waghaera kisi kaam me laana ya sawari lena hai to agarche
char kar guzar karta ho wo sayema nahi aur iski zakaat wajib nahi yu hain agar
gosht khaane k liye hai to sayema nahi agarche jungle me charta ho aur agar
tijarat ka jaanwar charabi per hai to ye bhi sayema nahi balkey iski zakaat ki
qeemat lagakar ada ki jayegi.
(DUR E MUKHTAR, RAD UL MUKHTAR)
OO'NTH KI ZAKAAT
MASLA:
5 Oo'nth se kam me zakaat wajib nahi aur
jab 5 ya 5 se zyada ho magar 25 se kam to 5 me ek bakri wajib hai yaani 5 ho to
ek bakri, 10 ho to 2 bakri.
(DUR E MUKHTAR)
MASLA:
Zakaat me jo bakri di jaye wo saal bhar
kam ki na ho, bakri dey ya bakra jo chahey.
(RAD UL MUKHTAR)
MASLA:
Do nisabo k darmiyaan me jo ho wo azu
hain yaani inki kuch zakaat nahi, maslan 7, 8 ho jab bhi wahi ek bakri.
(DUR E MUKHTAR)
MASLA:
25 oonth ho to 1 binth mukhaaz (yaani ek
saal se kuch zayed umar ki oontni) 35 tak yahi hukum hai yaani wahi ek binth
mukhaaz dey, 36 se 45 tak me ek binth laboon (yaani 2 saal se kuch upar ki
oontni) 46 se 60 tak me ek haqqa (3 saal se kuch upar ki oontni) 61 se 75 tak
ek juz'aa (yaani 4 saal se kuch upar ki oontnii) 76 se 90 tak do bint laboon.
91 se 120 tak me do haqqa iskey baad 145
tak 2 haqqa aur har paanch me ek bakri maslan 125 me 2 haqqa 1 bakri aur 130 me
2 haqqa 2 bakriyaan, phir 150 me 3 haqqa agar isse zyada ho to inme waesa hi
karey jaesa shuru me kiya tha yaani har paanch me ek bakri aur 25 me binth
mukhaaz 36 me binth laboon ye 186 balkey 195 tak ka hukum hogaya yaani itne me
3 haqqa aur ek binth laboon dedey phir 200 k baad wahi tariqa bartey jo 150 k
baad hai.
MASLA:
Oont ki zakaat me jo oont ka bacha diya
jata hai to zaroor hai k wo madar ho, nar dey to maada ki qeemat ka ho warna
nahi liya jayega.
GAAYE BHAENS KI ZAKAAT
MASLA:
30 se kam gaaye ho to zakaat wajib nahi
jab 30 puri ho to inki zazkaat me ek tabeey (yaani saal bhar ka bachda/ saal
bhar ki bachiya) hai aur 40 ho to ek masan (yaani 2 saal ka bachda) ya masna
(do saal ki bachiya) 59 tak yahi hukum hai, Phir 60 me do tabeey ya tabee'a
phir har 30 me ek tabeey ya tabee'a aur har 40 me ek masan ya masna maslan 70
me ek tabeey aur ek masan aur isi me do masan.
MASLA:
Gaaye bhaens ka ek hukum hai aur agar
dono ho to milaley jaese 20 gaye hain aur 10 bhaensey to zakaat wajib hogayi
aur zakaat me iska bacha liya jaye jo zyada ho yaani gaye zyada ho to gaaye ka
bacha aur bhaens zyada ho to bhaens ka bacha aur koi zyada na ho to zakaat me
wo bacha ley jo matwasat darja ka ho.
(ALAMGIRI)
BHEED BAKRI KI ZAKAAT
40 se kam bheed bakriyan ho to zakaat
wajib nahi aur 40 ho to ek bakri aur yahi hukum 120 tak hai yaani inme bhi wahi
ek bakri hai aur 121 me 2 bakri aur jo do nisabon k beech me hai inki zakaat
muaaf hai.
MASLA:
Zakaat me ikhtiyaar hai k bakri dey ya
bakra jo kuch bhi ho ye zaroor hai k saal bhar se kam ka na ho agar kam ka ho
to qeemat k hisaab se diya jasakta hai.
(DUR E MUKHTAR)
MASLA:
Bheeed, dumba, bakri me dakhil hain k ek
qism se nisaab puri na ho to dusri qism ko milaley aur zakaat me bheed dumba
bhi de sakte hain magar saal bhar se kam k na ho.
(DUR E MUKHTAR)
MASLA:
Agar kisi k paas oont gaye bakriyan sab
hain magar nisaab kisi ka pura nahi to nisaab puri karne k liye milaye na
jayenge aur zakaat wajib na hoti.
MASLA:
Ghodey, gadhey ya khachar agarche
charayi per ho inki zakaat nahi haan agar tijarat k liye ho to inki qeemat
lagakar iska 40va hissa zakaat me de.
(DUR E MUKHTAR)
ZAKAAT KIN LOGO KO DI JAYE
Zakaat k haqdaar 7 log hain, faqeer,
miskeen, aamil, raqaab, gharam, fisabeel lillah, ibne al sabeel.
MASLA:
Faqeer wo aadmi hai jis k paas kuch ho
magar na itna k nisaab ko pachoch jaye ya nisaab k barabar ho to iski haajat
asliya me mustaghraq ho jaese rehne ka makaan, pehenne k kapde khudmat k liye
laondi o ghulam peshe k aozaar waghaera jo zarurat ki cheezey hain chahey kitni
hi qeemti ho ya itne ka qarzdaar ho k qarz nikalne k baad jo bache wo nisaab k
barabar na ho ye cheezey agar ho aur nisaab se zyada ki maliyat me ho jab bhi
faqeer hai.
(RAAD UL MUKHTAR)
MASLA:
Miskeen wo hai jiskey paas kuch na ho
yaha tak k khaaney aur badan chupane k liye iska mohtaaj hai k logo se sawaal
karey.
MASLA:
Miskeen ko sawaal halaal hai aur faqeer
ko sawaal najayez hai isliye k jiskey paas khaane aur badan chupane ko ho usey
baghaer zarurat o majburi k sawaal haraam hai.
(ALAMGIRI)
MASLA:
Aamil wo hai jisey baadshah islam ne
zakaat ashr wasool karne k liye muqarrar kiya ho usey kaam k lehaaz se itna
diya jaye k isko iskey madadgaro ko mat'wasath taor per kaafi ho magar itna na
diya jaye k jo wasool kar laaya hai iskey aadhey se zyada hojaye.
(DUR E MUKHTAR)
MASLA:
Raqaab se muraaad makatib ghulam ko dena
k is maal zakaat se badal kitabat dekar apni gardan chudaye.
MASLA:
Gharam se muraad madyoon hai yaani isper
itna deen hokar isey nikalne k baad nisaab baqi na rahe.
(DUR E MUKHTAR)
MASLA:
Fi sabeel lillah yaani raah e khuda me
kharch karna iski kayi surtey hain jaese koi jihaad me jana chahta hai aur
samaan iskey paas nahi to zakaat ka maal de sakte hain agarche wo kama sakta ho
ya koi haj ko jana chahta hai aur iskey paas maal nahi isko zakaat de sakte
hain amgar isey haj k liye sawaal karna jayaz nahi.
Ya talib e ilm jo ilm e deen padhta hai
isey bhi zakaat de sakte hain balkey ye talib e ilm sawaal karkey bhi maal zakaat
le sakta hai jab isne apne apko isi kaam k liye farigh kar rakha ho, agarche
kama sakta ho yunhi har nek kaam k liye zakaat kharch karna fi sabeel lillah
hai jabkey bataor tamleek ho baghaer tamleek zakaat ada nahi ho sakti.
(DUR E MUKHTAR)
MASLA:
Bahot se log zakaat ka maal islami
madarso me bhejdete hain inko chahiye k mutawalli madarse ko batadey k ye
zakaat hai taakey mutawalli isko alag rakhey aur dusrey maal me na milaye aur
ghareeb talaba per kharch karey kisi kaam ki ijrat me na de warna zakaat ada na
hogi.
(BAHAR E SHARIYAT)
MASLA:
Ibne al sabeel yaani musafir jiskey paas
maal na raha wo zakaat le sakta hai agarche ghar per maal maojood ho magar itna
hi le jisse zarurat puri hojaye zyada ki ijazat nahi.
MASLA:
Zakaat ada karne me ye zaruri hai k
jisey de isey malik banadey abahat kaafi nahi, lehaza zakaat ka maal masjid me
lagana, yaisse mayyat ko kafan dena ya mayyat ka deen ada karna, ya ghulam
azaad karna, pul ya sadak banwadena, neher ya kuwaan khudwa dena in chizon me
kharch karna ya kitaab waghaera koi cheez khareed kar waqf kardena kaafi nahi
isse zakaat ada na hogi jab tak kisi faqeer ko malik na banadey, albatta faqeer
zakaat k maal ka malik hojane k baad khud apni taraf se in kaamo me kharch
karey to kar sakta hai.
(ALAMGIRI)
MASLA:
Apni asal yaani maa, baap, dada, dadi,
nana, nani, waghaera jinki aolaad me ye hai aur apni aolaad yaani beta, beti,
pota, poti, nawasa, nawasi waghaera ko zakaat nahi de sakta yunhi sadqa fitr o
nazar sharyi o kafara bhi inhey nahi de sakta, raha sadqa nafil to wo de sakta
hai balkey behtar hai.
(ALAMGIRI O DUR E MUKHTAR)
(ALAMGIRI O DUR E MUKHTAR)
MASLA:
Bahu, damad aur saoteli maa ya saoteley
baap ya zaoja ki aolaad ya shohar ki aolaad ko zakaat de sakta hai aur
rishtedaro me jiska nafqa iskey zimme wajib hai isey zakaat de sakta hai jabkey
nafqa me mahsoob na karey.
(RAD UL MUKHTAR)
MASLA:
Aorat shohar ko aur shohar aorat ko
zakaat nahi de sakta albatta talaaq dene k baad jab k iddat puri ho chuki ho to
baad iddat khatam karne k de sakta hai.
(DUR E MUKHTAR O RAD UL MUKHTAR)
MASLA:
Ghani ki bibi ko zakaat de sakte hain
jab k nisaab ki malik na ho yunhi ghani k baap ko de skate hain jab k faqeer
hai.
(ALAMGIRI)
MASLA:
Ghani mard k nabaligh bache ko zakaat
nahi de sakte aur ghani ki baligh aolaad k de sakta hain jab k ye faqeer ho.
(DUR E MUKHTAR O ALAMGIRI)
MASLA:
Moti heera waghaera jawahar jiske paas
ho aur tijarat k liye na ho to inki zakaat wajib nahi magar jab nisaab ki
qeemat k ho to zakaat le nahi sakta.
(DUR E MUKHTAR)
MASLA:
Bani hashim ko zakaat nahi de sakte bani
hashim se yaha muraad hazrat ali, hazrat jafar, aur hazrat abbas (رضي
الله عنهم) ki aoladey hain.
(ALAMGIRI O RAD UL MUKHTAR)
MASLA:
Maa hashmi balkey syadani ho aur baap
hashmi na ho to hashmi nahi isliye k shara me nasab baap se hai lehaza aese
shaks ko zakaat de sakte hain jab k na dene ki koi aur waja na ho.
(BAHAR E SHARIYAT)
MASLA:
Sadqa nafil aur waqf ki amadni bani
hasham ko de sakte hain.
(DUR MUKHTAR)
MASLA:
Zimmi kafir ko na zakaat de sakte hain
na koi sadqa wajiba jaese nazar kafara ya sadqa fitr aur harbi ko kisi qism ka
sadqa dena jayaz nahi na wajiba na nafil agarche wo harbi dar ul islam me
baadshah islam se amaan lekar aaya ho.
(DUR E MUKHTAR)
MASLA:
Hindustan agarche dar ul islam se magar
yaha k kufar zimmi nahi inhey sadqaat nafil maslan hadya waghaera dena bhi
najayaz hai.
(BAHAR E SHARIYATH)
MASLA:
Jin logo ki nisbat bayaan kiya gaya k
inhey zakaat de sakte hain in sabka faqeer hona shart hai siwa aamil k k iske
liye faqeer hona shart nahi aur ibne al sabeel agarche ghani ho halat safar me
jab k maal na ho to wo bhi faqeer k hukum me hai baqi kisi ko jo faqeer na ho
zakaat nahi de sakte.
(DUR E MUKHTAR)
SADQA E FITR KA BAYAAN
RASOOL ALLAH ne farmaya bande ka roza
asmaan o zameen k beech me ruka rehta hai jab tak sadqa e fitr ada na karey.
(IBNE ASAKIR)
MASLA:
Sadqa e fitr wajib umr bhar iska waqt
hai yaani agar ada na kiya ho to ab ada kardey ada na karne se saqat na hoga na
ab ada karna qaza hai balkey ab bhi ada hi hai agarche sunnat EID ki namaz se
peehle ada kardeta.
(DUR E MUKHTAR)
(DUR E MUKHTAR)
MASLA:
Eid k din subah sadeq shuru hote hi
sadqa fitr wajib hojata hai lehaza jo shaks subah sadeq se pehle margaya ya
faqeer hogaya to isper sadqa e fitr wajib na hua.
(ALAMGIRI)
MASLA:
Subah sadeq shuru hone k baad jo bacha
paeda hua ya jo kafir musalman hua ya jo faqeer ghani hua isper sadqa e fitr
wajib na hua.
(ALAMGIRI)
MASLA:
Subah sadeq shuru hone se pehle kafir
musalman hogaya ya bacha paeda hua ya jo faqeer tha wo ghani hogaya to sadqa e
fitr wajib hai.
(ALAMGIRI)
MASLA:
Jo subah sadeq shuru hone k baad mara
isper sadqa e fitr wajib hai.
(ALAMGIRI)
MASLA:
Sadqa fitr har musalman azaad malik
nisaab per (jiski nisaab hajat e asliya k alawa ho) wajib hai ismey ghafil
baligh aur maal naami hone ki shart nahi yaani maal per sall guzarna shart
nahi.
(DUR E MUKHTAR)
MASLA:
Mard malik nisaab per apni taraf se aur
apne chotey bache ki taraf se sadqa e fitr wajib hai, jab k bache khud malik na
ho aur agar bacha nisaab ka malik ho to uska sadqa e fitr isi k maal se diya
jaaye aur majnoon aolaad agarche baligh ho jsb k ghani na ho to iska sadqa e
fitr iskey baap per wajib hai aur ghani ho to khud iskey maal se diya jaye.
(DUR E MUKHTAR O RAD UL MUKHTAR)
MASLA:
Sadqa e fitr wajib hone k liye roza
rakhna shart nahi agar kisi azar safar marz budhapey ki waja se ya Maaz'ALLAH
bila azar roza na rakha jab bhi wajib hai.
(RAD UL MUKHTAR)
MASLA:
Baap na ho to dada baap ki jaga hai
yaani apne faqeer o yateem potey poti ki taraf se isper sadqa e fitr dena wajib
hai.
MASLA:
Apni aorat aur aqil baligh aolaad ka
sadqa e fitr iskey zimme nahi agarche ye apahij ho agarche inka nafqa iskey
zimme ho.
(DUR E MUKHTAR)
SADQA E FITR KI MUQDAAR
Sadqa e fitr ki muqdaar ye hai gyahu ya
iska aata ya satu adha sa'a khajoor ya munqi ya jao ya iska aata ya satu ek
sa'a.
(DUR MUKHTAR, ALAMGIRI)
MASLA:
Gyahu aur jao dene se inka aata dena
afzal hai aur isse afzal ye k qeemat de chahe gyahu ki qeemat de ya jao ki ya
khajoor ki, magar girani me khud in chizo ka dena qeemat dene se afzal hai aur
agar kharaab gyahu ya jao ki qeemat di to ache ki qeemat se jo kami padey wo
puri karde.
(RAD UL MUKHTAR)
SA'A KA WAZAN:
Aala darje ki tehqeeq aur ehtiyaat ye
hai k sa'a ka wazan 351 rupiya bhar hai aur nusf sa'a ka wazan 175 rupiya
athani bhar upar hai, (fatawa razwiya) yaani isi bhar k nambari sayer se jo aaj
kal hind k aksar shehro me rayej hai, ek sa'a char seyr sawwa chey chatank ka
hota hai aur adha sa'a do seyr sawwa teen chatank ka hota hai asaani aur zyada
ehtiyaat isme hai k gyahu sawwa do seyr nambari ya jo sadhey chaar seyr nambari
ek ek shaks ki taraf se dey.
SADQA E FITR KISKO DEY:
Sadqa e fitr k musaraf yaani haqdaar
wahi hain jo zakaat k hain yaani jinko zakaat de sakte hain inhey fitra bhi de
sakte hain siwa aamil k iskey liye zakaat hai fitra nahi.
(DUR E MUKHTAR)
POST WRITTEN BY:-
"عشقِ نبي ﷺ"
Ishq e Nabi ﷺ
JOIN WHATSAPP GROUP
SEND YOUR NAME AND CITY
JOIN WHATSAPP GROUP
SEND YOUR NAME AND CITY
