MAAH E ZILHAJJA AUR QURBANI

MAAH E ZILHAJJA AUR QURBANI

NABI KAREEM ﷺ K ASHRA ZIL HAJJA K ROZE

Isse muraad zilhajja k shuru 9 roze rakhna hai.

Hazrat Haneeda bin Khalid apni biwi se aur wo NABI KAREEM ﷺ ki ek zaoja mathara se riwayat karti hain, wo farmayi hain NABI KAREEM ﷺ 9 Zilhajja ka roza rakhte the.

(Sunan Abu Daood)

SAHIH BUKHARI me sabit hai k NABI KAREEM ﷺ ne farmaya, in (10 dino) se badhkar kisi din me amal ki fazeelat nahi.

Isse Zilhajja ka pehla ashra muraad hai aur is hadees se zilhajja k ashra awwal yaani pehle 9 din me roze ki fazilat per istedlaal kiya gaya hai kyu k roza bhi amal me daakhil hai.

Isper aetraaz hota hai k EID k din roza rakhna haraam hai to iska jawaab yu diya gaya hai k ghalib dino per mahmool hai, yaani 9 dino ko ashra kaha gaya hai.

Hafiz Ibne Hajar رحمة الله عليه farmate hain, k Qasim bin abi ayub رضي الله عنه ki riwayat me aaya hai k ALLAH TA'ALA k haan koi amal zilhajja k dus dino me kiye gaye amal se zyada pakeeza aur azeem nahi hai.

(Sunan Waari, Jild 2 Page 26)

(Al Targheeb Wal Tarteeb, Jild 2, Page 198)

(Kanzul Ummal, Raqam Al Hadees 35187)

SAHIH ABI AWAANA aur SAHIH IBNE HABBAN me Hazrat Jabir رضي الله عنه se marwi hadees hai, koi din ALLAH TA'ALA k nazdeek zilhajja k pehle ashre se zyada fazilat waley nahi hain.

To Zilhajja k pehle ashrey ki fazilat saal k dusre dino per sabit hogayi aur iska faeda yu zaahir hota hai k agar koi shaks afzal dino me roza rakhne ki nazar zamane ya kisi amal ko in dino se mashroot karde aur inme se sirf ek din ka zikr karey to 9 zilhajja ka din mat'yeen hojayega, kyu k sahih qaol k mutabiq yahi din in 10 mazkoora dino me se afzal hai.

HUZOOR NABI KAREEM ﷺ ne farmaya k ALLAH TA’ALA ki ibadat k liye ashra zilhajja (zilhajja k 10 din) se behtar koi zamana nahi, inmey ek din ka roza ek saal k rozo k barabar aur ek raat me ibadat karna shab e qadar ki ibadat k barabar hai.

(Tirmizi, Ibne Maaja)

Hazrat ibne Abbas رضي الله عنه se riwayat hai, RASOOL ALLAH ﷺ ne farmaya, zilhajja k ibtedayi 10 dino k muqaabley me dusrey koi ayyaam aese nahi jinme nek amal ALLAH TA’ALA ko in dino se zyada mehboob ho.

Sahaba Kiraam رضي الله عنهم اجمعين ne arz kiya, YA RASOOL ALLAH ﷺ, ALLAH ki raah me jihad karna bhi nahi? Aap ﷺ ne farmaya, ALLAH ki raah me jihad karna bhi nahi, siwaye is mujahid k jo apni jaan aur maal lekar (jihaad k liye) nikla aur phir kisi cheez k sath waapas nahi (yaani shaheed hogaya) ye dusro se yaqeenan afzal hai.

(Sahih Bukhari)

Hazrat Abu Qatada رضي الله عنه bayaan farmate hain k RASOOL ALLAH ﷺ se arfa k roze ki baabat sawaal kiya gaya, AAP ﷺ ne farmaya, wo guzishta aur aayinda saal k gunaho ka kafara ban jaata hai.

(Sahih Muslim)

Janaab Hazrat Ayesha SIddiqua رضي الله عنهما se marwi hai ek naojawaan is haal me tha k ZILHAJJA ka chaand namodaar hojata to wo roze rakhna shuru kardeta tha, iskey mutalliq SARWAR E DO ALAM ﷺ ko malum hua.

Aap ﷺ ne isko talab farmakar pucha in ayyaam me tu kyu roze rakhta hai, arz kiya YA RASOOL ALLAH ﷺ aap per mere maa baap nisaar ye imam mashayer (haj ki nishaniyo k din) aur ayaam e hajj hain.

Mumkin hai ALLAH TA’ALA mujhko bhih inki duao me shamil farmale, Aap ﷺ ne farmaya (agar yu hai to) tere waste har roze k auz ek sad ghulaam ko azaad karne ek sad oonto ko khaeraat karne ek sad ghodey aese jinper jihad (k liye samaan) fi sabilillah rakha ho, k barabar ajar hai.

Aur yaom al tarwiyah (8 zilhajja) ko is din 1000 ghulaam azaad kardene 1000 oont ki qurbani aur 1000 hazaar ghodey samaan jihad fi sabilillah dene k barabar tumhare haq me sawaab hai.

Aur yaom e arfa (9 zilhajja) k roz jab hojayega to tumhare waastey 2000 ghulam azaad karne 2000 oont ki qurbani aur 2000 ghode jinper fi sabilillah sawari karte hain k barabar sawaab hoga.

(Mukashifatul Quloob)

RASOOL ALLAH ﷺ ka irshad hai arfa k din ka roza do baras k rozo k barabar hota hai aur yaom e ashoora ka roza ek baras rozo k masawi hota hai, ALLAH TA'ALA ne farmaya, ووعدنا موسى ثاثين ليلة و اتممنها بعشر, aur humne waada farmaya moosa k sath 30 raato ka aur iski takmeel dus k sath farmayi.

(Mukashifatul Quloob)

Hazrat Ibne Masood رضي الله عنه raawi hain k ALLAH ayyaam me se 4 ayyam aur mahino me se 4 mahine aur aurto me se 4 aurtey aur jannat me aoliyat karn wale 4 aur jinka ishtiyaaq jannat rakhti hai inmey se bhi 4 ka intekhaab kiya hai,

1. JUMA KA ROZ:

Is din me ek sa'ath wo hai k is daoraan koi musalman ALLAH se jo kuch maangta hai to ALLAH TA'ALA isko ata farmata hai khwaah duniya talab karey ya aakhirat.

2. YAOM ARFA:

Zilhajja ki 9 tareekh arfa ka din hai ye HAJJ ka din hai is din ALLAH TA'ALA malayeka k saamne fakhr farmata hai k aye farishto, dekhlo ye mere bande aaye huye hain, girdey atey huye, bikhrey baalo k sath unhone apne maal sarf kiye, apne badan ko thakaya, ab tum gawah hojao k maine inki maghfirat farmadi hai.

3. YAOM UL NAHER:

(Ye Eid Ul Azha ka Din Hai) ye yaom ul naher hota hai, banda qurbani pesh karta hai, is qurbani k jaanwar k khoon ka aoleen girna wala qatra hi is bande k ma'asi ka kaffara hojata hai.

4. YAOM UL FITR:

(Ye Eid ul Fitr wala roza hai), Log ramadan ul mubarak k roze rakhne k baad namaz eid ada karne k liye nikal aate hain to ALLAH TA'ALA farishto se mukhatib hota hai k har mazdoor apni ujrat talab karta hai.

Mere bande roze rakhte rahe hain aur ab EID padhne k liye nikal pade hain ye apni mazduri chahte hain, tumko main gawaah banakar farmata hoon k inhey maine bakhsh diya hai, ek nida karne wala ye awaaz deta hai AYE UMMAT E MUHAMMED ﷺ tum ab aesi haalat me laot kar jaao k tumhari buraiyaan maine nekiyo me tabdeel farmadi hain.

(Mukashifatul Quloob)

Janaab e risalat ﷺ ka irshaad hai, yaom al tarwiyah 8 zilhajja ko jo shaks roza rakhey isko ALLAH TA'ALA Hazrat Ayub عليه السلام k apni ibtela k waqt sabar karne ki manind ajar ata farmayega aur jo arfa k din 9 zilhajja roza rakhley isey ALLAH TA'ALA Hazrat Eesa عليه السلام k sawaab k maanind sawaab ata farmayega.

(Mukashifatul Quloob)

RASOOL ALLAH ﷺ se riwayat kiya gaya hai k jab yaom arfa aata hai ALLAH TA'ALA apni rehmat ko phaela deta hai, jitne log is roz dozakh se nijaat paate hain inse zyada kisi din bhi log dozakh se azaad nahi hote hain.

Aur jo yaom arfa ka roza rakhley wo pichle saal aur aayinda saal k tamaam gunafo ka kaffara hojayega, (yaha sagheera gunahon ka kaffara hoga, kabeera gunaho se muaafi o taoba karne aur huqooq al ibaad ada karne se hai.

(Mukashifatul Quloob)

Iski waja ye hai k ye din do eido k darmiyaan hai jabke dono hi eidey ahle islaam k liye khushi k din hote hain aur gunah muaaf hojane ki khushi se badi aur koi khushi nahi hoti aur ashoora ka roza eideyn k baad aata hai, to ye ek saal k gunaho ka kaffara hota hai.

Dusri waja ye hai k ye din Hazrat Moosa عليه السلام k waaste tha, jabke yaom arfa hamare NABI KAREEM ﷺ k waastey hai aur aapki azmat o izzat sabse badhkar hai.

(Mukashifatul Quloob)

QURBANI KI TAREEF

Qurbani ye ek maali ibadat hai jo ghani per wajib hai khaas jaanwar ko khaas din me ALLAH TA'ALA k liye sawaab ki niyyat se zubaah karna qurbani hai, musalmaan, muqeem, malik e nisaab, azaad per wajib hai.

QURBANI KI FAZILAT

Ummul Momineen Hazrat Ayesha Siddiqua رضي الله عنهما se marwi hai k NABI E PAK ﷺ ne irshad farmaya k Yaom neher (10vi zilhajja) me ibne aadam ka koi amal khuda k nazdeek khoon bahane (qurbani karne) se zyada pyaara nahi aur wo jaanwar qayamat k din apne seeng aur baal aur kharo k saath aayega aur qurbani ka khoon zameen per girne se qabl khuda k nazdeek maqaam e qubuliyat me pahonch jata hai lehaza isko khush dili se karo.
(Abu Daood Ba Hawala Bahar e Shariat)

QURBANI KIS PER WAJIB HAI

Qurbani wajib hone ka sabab waqt hai yaani jab wo waqt aaya aur sharayet jo paaye gaye qurbani wajib hogayi aur iska rakan in makhsoos jaanwaro me se kisi ko qurbani ki niyyat se zubah karna hai.

(Bahaar e Shariat)

MASAEL

Qurbani k waqt me qurbani karna hi laazim hai koi dusri cheez iskey qatam maqaam nahi ho sakti.
(Bahar e Shariat)

Jis tarah qurbani mard per wajib hai isi tarah aurat per bhi wajib hai.

(DUR E MUKHTAR)

Musafir per qurbani wajib nahi lekin agar nafeel k taor per karey to kar sakta hai, sawaab paayega.

(DUR E MUKHTAR)

Malik e nisaab hone se muraad itna maal hona hai k jitna maal hone se sadqa fitr wajib hota hai yaani haajat e asliya k alawa 200 dirham (52.5 tola chaandi) ya 20 deenar (7.5 tole sona) ka maalik ho.

(DUR E MUKHTAR, ALAMGIRI)

Jo shaks 200 dirham ya 20 deenaar ka malik ho ya haajat k siwa kisi aesi cheez ka malik ho jiski qeemat 200 dirham ho to wo ghani hai isper qurbani wajib hai.

(ALAMGIRI)

QURBANI K JAANWAR KI UMR

Oont ya oontni 5 saal, gaaye, bayel bhaens do saal, bakra bakri dumba dumbi bheed ek saal.

(Bahar e Shariat)

QURBANI KA WAQT

Daswi zilhajja ki subah sadiq se 12wi k ghuroob aftaab tak hai yaani 3 din aur 2 raatey lekin daswi sabme afzal hai phir 11wi phir 12wi.

MASAEL

Sheher me qurbani ki jaaye to shart ye hai k NAMAZ EID k baad ho aur dehaat me chonkey NAMAZ EID nahi isliye subah sadiq se ho sakti hai.

Qurbani k waqt me qurbani hi karni laazim hai itni qeemat ye itni qeemat ka jaanwar sadqa karne se wajib ada na hoga.

(ALAMGIRI)

Qurbani k din guzarjaane k baad qurbani faot hogayi ab nahi ho sakti lehaza agar koi jaanwar qurbani k liye khareed rakha hai to iska sadqa karey warna ek bakri ki qeemat sadqa karey.
(RAD UL MUKHTAR, ALAMGIRI)

QURBANI ME SHIRKAT K MASAEL

Jab qurbani ki shartey paayi jaye jinka upar bayaan hua to ek bakri ya bheed ka zubah karna ya oont gaaye, ka saatwaan hissa wajib hai, isse kam nahi ho sakta yaha tak k agar kisi shareek ka hissa saatwey se kam hai to kisi ki qurbani sahih na hogi.

Haan saat se kam shareek ho aur hisse bhi kam e besh ho lekin kisi ka hissa saatwey se kam na ho to jayaz hai.

Qurbani k sab shareeko ki niyyat taqreeb (yaani sawaab paana) hona chahiye khaali gosht haasil karna na lehaza aqeeqa karne wala shareek ho sakta hai (k aqeeqa bhi taqreeb ki ek surat hai).

(RAD UL MUKHTAR)

JAANWAR ME AYEB

Qurbani k jaanwar ka in ayebo se paak hona zaruri hai warna qurbani nahi hogi.

1. Itna kamzor k jiski haddiyo me maghz na raha ho.

2. Langda is qadr k chal na sakta ho.

3. Bimaar hona, (jiski bimari zaahir ho).

4. Kaan, dum ya koi aur azu tahayi 1/3rd se zyada kata ho.

5. Seeng tahayi se zyada toota ho.

6. Jiske paedayish daant na ho, jiske than katey ho.

7. Bakri ka ek than aur gaaye k do than khashk hogaye ho.

8. Naak kati hona.

(Bahar e Shariat)

QURBANI KA TARIQA

Qurbani k jaanwar ko zibah se pehle chaara paani dedey pehle se churi tez larkey lekin jaanwar k saamne nahi, jaanwar ko baaye pehlu per is tarah litaye k qible ki taraf iska mu ho aur zibah karne wala apna daahna paau iskey pehlu per rakh kar tez churi se jald zibah kardey aur zibah se pehle ye dua padhe.

انى وجهت وجهى للزى فطر السموات والارض حنيفا وما انا من المشركين ان صلاتى ونسلى ومحياى ومماتى لله رب العالمين لا شريك له وبذالك امرت وانا من المسلمين اللهم لك ومنك يسم الله الله اكبر

Dua Khatam karte hi churi chaladey qurbani apni taraf se ho to zibah k baad ye dua padhe.

الهم تقبل منى كما تقبلت من خليلك ابراهيم عليه السلام و حبيبك محمد صلى الله عليه وسلم

Zibah me chaaro ragey katey ya kam se kam teen isse zyada na kaatey k churi mehra tak pahoch jaaye k ye bewaja ki takleef hai thanda hone per paau kaatey khaal utaarey agar dusrey ki taraf se zibah kiya hai to منى ki jaga من falaan kahey.

Yaani us shaks ka naam ley jiskey naam se qurbani di ja rahi hai, aur agar mushtarak jaanwar ho jaese gaaye, ya oont, ya bhaens, to falaan ki jaga sab shareeko k naam ley.

Agar Dusre se zibaah karaye to behtar hai k khud bhi haazir rahe.

GOSHT AUR KHAAL K MASAEL

Agar jaanwar mushtarik hai to gosht tol kar taqseem kiya jaye atkal se na baatey k agar kisi ko zyada pahonch gaya to dusrey k maaf karne se bhi jayaz na hoga k haq shara hai.

(Rad Ul Mukhtar)

Phir apne hisse k 3 hisse karkey ek hissa faqeero ko dedey aur ek hissa dosto aur azeezo ko dey aur ek hissa apne ghar walo k liye rakhey khud bhi khaaye baal bacho ko bhi khilaye agar ghar waley zyada ho to kul ghar k sarf me la sakta hai aur kul sadqa bhi kar sakta hai agarche ek hissa apne liye behtar hai.

MASAEL

Agar mayyat ki taraf se qurbani ki to iskey gosht ka bhi yahi hukum hai albatta agr mayyat ne kaha tha k meri taraf se qurbani kardena to is surat me kul gosht sadqa kardey.

Qurbani agar mayyat ki hai to iska gosht na khud kha sakta hai balkey isko sadqa karna wajib hai.

Qurbani karne wala baqr'eid k din sabse pehle qurbani ka gosht khaaye ye mustahib hai.

(Beher Al Raayeq)

Qurbani ka gosht kaafir ko na dey k yahaan kuffar harbi hain.

Chamda, jhool, rassi, haar sab sadqa kardey chamde ko khud apne kaam me bhi la sakta hai, maslan dol jae namaz bichona waghaera bana sakta hai lekin bech kar qeemat apne kaam me laana jayaz nahi agar bech diya to is qeemat ko sadqa kardena wajib hai.

(Dur e Mukhtar, Rad Ul Mukhtar)

Aajkal aksar log khaal deeni madarse me diya karte hain ye jayaz hai agar madarse me dene ki niyyat se khaal bechkar qeemat madarse me dedey to ye bhi jayaz hai.

(Alamgiri)

Qurbani ka gosht ya chamda qassab ya zibaah karne waley ko mazdoori me nahi de sakta haan agar dosto ki tarah hadyatan hissa diya to de sakta hai jisey isey ujrat me shumaar na karey.

(Hidaya)

Baaz jaga qurbani ka chamda masjid k imam ko dete hain agar tankhwaah me na diya jaye balkey bataor madad k dey to harj nahi.

(Bahar e Sharait)

KIN JAANWARO KI QURBANI HO SAKTI HAI

Qurbani ka jaanwar gaaye bhaens, bakri, bheed nar o maada qurbani ho sakti hai.

(Alamgiri)

Wehshi jaanwar jaese hiran, neel, gaaye, baara singha waghaera ki qurbani nahi ho sakti.

(Alamgiri)

Dumba bheed hi me daakhil hai.

Oont 5 saal, gaaye 2 saal bheed bakri ek saal ki ho ya zyada ki isseyy kam ki najayaz hai haan agar dumba ya bheed ka 6 maah bacha itna bada ho k dur se dekhne me saal bhar ka malum hota ho to iski qurbani jayaz hai.

(Dur e Mukhtar)

QURBANI KA JAANWAR KAESA HONA CHAHIYE

Tanda jiskey paedayish seeng na ho jayaz hai albatta agar seeng the aur toot gaye aur meng yaani goda tak toot gaye to jayaz nahi isse kam toota hai to jayaz hai.

(Alamgiri)

Andha, langda, kaana, bajd dubla, kaan katta, be daant ka, than katta, than sookha, naak katta, paedayish be kaan ka beemar khansa (jiskey dono nishaniya ho jalala (jo sirf ghaleez khata ho) in sabki qurbani jayaz nahi.

(Dur e Mukhtar)

Bimari agar khafees hai aur langdapan halka hai k chal phir leta hai qurbaan gaah tak ja sakta hai ya kaan naak dum tahayi se zyada nahi kiye to jayaz hai.

(Dur e Mukhtar o Alamgiri)

Qurbani ki aur pet me zinda bacha hai to isey bhi zibah karde aur kaam me la sakta hai aur mara hua to phenk de.

(Bahar e Shariat)

Khareedne k baad qurbani se pehle jaanwar ne bacha dediya to isey bhi zibaah kar daaley aur agar bechdiya to iski qeemat ko sadqa karey aur agar ayaam qurbani me zibah na kiya to zinda sadqa karde.

(Alamgiri)

HAMARE AQA O MAOLA HAZRAT AHMED E MUJTABA MUHAMMED MUSTAFA ﷺ k karam ameem ko dekho k khud is ummat marhooma ki taraf se qurbani ki aur is maoqe per bhi ummat ka khayaal farmaya lehaza jis musalman se ho sakey wo SARKAR E DO JAHAN ﷺ k naam ki qurbani karey to kaesi khush naseebi hai.

(Bahar e Shariat)

LIKE COMMENT AND SHARE...

 LIKE OUR FB PAGE

www.facebook.com/ishq.e.nabi1

TWITTER
https://twitter.com/ishqe_nabi